![ТОО «ПГУ Туркестан» [KZ]](/upload/CAllcorp3/3b3/qa5faean8ipo8cwwrxrhq0clxz2ljgco.png "ТОО «ПГУ Туркестан» [KZ]")
2026 жылғы 30 наурызда Сайрам ауданының Қарамұрт ауылының Мәдениет үйінде «Түркістан БГҚ» ЖШС-нің сыртқы газбен жабдықтау жобасы бойынша ашық жиналыс түріндегі қоғамдық тыңдаулар өтті. Іс-шараға Қарамұрт ауылының тұрғындары, «Түркістан БГҚ» ЖШС Басқарма төрағасының орынбасарлары Серік Иманбаев пен Гүлбаршын Әбдіғалиева, мердігер ұйымдардың өкілдері, облыстық табиғи ресурстар басқармасының маманы М. Болысбекова, сондай-ақ тыңдауға төрағалық еткен ауылдық округ әкімі М. Нәжиев қатысты.
«Түркістан БГҚ» ЖШС атынан кіріспе сөз сөйлеген Басқарма төрағасының орынбасары Серік Иманбаев сыртқы газбен жабдықтау жобасын іске асыру болашақ станцияны отынмен қамтамасыз етудің және стратегиялық нысанды пайдалануға беруге дайындаудың маңызды кезеңдерінің бірі екенін атап өтті.
Тұрғындарға станцияға газ жеткізуге арналған газ құбырының құрылысы туралы баяндалды. Жобаға сәйкес магистральдың жалпы ұзындығы 13,6 км-ді құрайды, ал трасса Қарамұрт ауылының бойымен өтеді.
Бүгінгі таңда сыртқы газбен жабдықтау жобасының негізгі әрі ең ауқымды бөлігі орындалған, газ тарату станциясы салынған. Қатысушыларға қалған жұмыстардың көлемі таныстырылып, қойылған сұрақтарға жауап берілді. Сонымен қатар жобаның қоршаған ортаға әсері барынша аз болатыны айтылды.
Қоғамдық тыңдаулар қорытындысы бойынша Қарамұрт ауылының тұрғындары жобаға оң пікір білдіріп, ұсынылған материалдардың толық әрі түсінікті болғанын атап өтті. Жобаны іске асыруға қатысты ескертулер мен қарсылықтар түскен жоқ.
