«Түркістан БГҚ» ЖШС: критикалық жол және қуатты шығару кабель трассалары бойынша жоспар–факт

Құрылыс-монтаж жұмыстарының қарқынына және жобаның критикалық жолын (critical path) сақтауына тікелей әсер ететін негізгі тораптардың дайындығы — «Түркістан БГҚ» ЖШС Басқарма төрағасы Ұлан Бүркітов өткізген көшпелі кеңестің негізгі тақырыбы болды. Жұмыс талқылауына бас мердігер - Doosan Enerbility және Integra Construction KZ компанияларынан құралған консорциум өкілдері қатысты. Жоспар–факт форматында қатысушылар апталық тапсырмалардың орындалуын салыстырып, критикалық жолдағы жұмыстарды нақтылап, алдағы технологиялық түйіспелердің реттілігін келісіп алды.

Ең алдымен қатысушылар әкімшілік-тұрмыстық кешеннің (ӘТК) құрылысы бойынша мәртебені нақтылап, жер асты галереясын қарап шықты. Аралау барысында АТҚ (ашық тарату құрылғысы) бойынша жұмыстардың барысы да бағаланды. Қазіргі уақытта автотрансформаторды орнатуға арналған жобалық орын дайындалуда - бұл жұмыстар қуатты шығару схемасына және жақын арадағы технологиялық түйіспелерге байланыстырылған. Автотрансформатор - электр энергиясының параметрлерін түрлендіріп, оны АТҚ жабдықтары мен электр беру желілері (ЭБЖ) арқылы желіге беруді қамтамасыз ететін қуатты шығару жүйесінің негізгі элементтерінің бірі.

«Түркістан БГҚ» ЖШС Басқарма төрағасы Ұлан Бүркітов мерзімдерді қатаң сақтау мен командалық үйлесімнің маңызын атап өтті: «Бәріміз бір команда ретінде 2026 жылдың соңына дейін бірінші газ турбинасын іске қосуға шоғырлануымыз керек, содан кейін қалған күштік жабдықты кезең-кезеңімен енгізуді қамтамасыз ету қажет. Мәселелі сұрақтарды жасырып қалмай, ортақ талқылауға шығару маңызды - сонда шешімдерді жедел тауып, оларды бірден жұмысқа енгіземіз».

Жұмыс кеңесі барысында алаңішілік инженерлік желілерді төсеу мәселелері талқыланды. Негізгі назарда - генераторлардан АТҚ-ға дейінгі кабель трассалары, әлсіз тоқ жүйелері бойынша жұмыстарды ұйымдастыру және мерзімдер, ЭБЖ құрылысының кестесі, сондай-ақ су дайындау және дизель шаруашылығы бойынша жұмыстардың ағымдағы жай-күйі болды.