«Түркістан БГҚ» электр станциясы құрылысының мониторингі

«Түркістан БГҚ» ЖШС Басқарма төрағасы Ұлан Бүркітов бу-газ электр станциясының құрылыс алаңында көшпелі жұмыс кеңесін өткізді. Іс-шараға бас мердігер - Doosan Enerbility және Integra Construction KZ компаниялары консорциумының өкілдері қатысты.

Инспекцияның негізгі мақсаты - жобаның іске асырылу барысын егжей-тегжейлі тексеру және бекітілген жұмыс кестесіне сәйкес әрбір құрылыс учаскесіндегі (титул) ілгерілеуді бағалау. Тұрақты визуалды мониторинг қосымша назар аударуды қажет ететін тұстарды жедел анықтауға мүмкіндік береді. Тексеру қорытындысы бойынша Ұлан Бүркітов құрылыс мерзімдерін мүлтіксіз сақтау үшін бірқатар салынып жатқан нысандарда жұмысшылар мен арнайы техника санын көбейтуді тапсырды.

«Негізгі стейкхолдерлер біздің жобамызға ерекше назар аударып отыр. Сондықтан «Түркістан БГҚ» ЖШС инженерлері бас мердігерлермен және барлық қатысушылармен бірге түпкілікті нәтижеге қол жеткізу үшін біртұтас команда болып жұмыс істеуі тиіс», - деп атап өтті «Түркістан БГҚ» ЖШС Басқарма төрағасы Ұлан Бүркітов.

Кеңес аясында тараптар №1 газ турбинасын іске қосуға дайындық жөніндегі іс-шаралар жоспарын талқылады. Басқарма төрағасы Ұлан Бүркітов ұжымға және «Түркістан БГҚ» ЖШС серіктестеріне ҚР Премьер-Министрі Олжас Бектеновтің Электр энергетикасы саласын дамыту мәселелері жөніндегі кеңесте берген «Түркістан БГҚ» жобасын аяқтау мерзімдерін мүлтіксіз сақтау туралы тапсырмасын жеткізді.