Сайрам ауданының әкімі «БГҚ Түркістан» серіктестігінің құрылыс алаңында болды

Түркістан облысы Сайрам ауданының әкімі Мадияр Оразалиев, жуырда қызметіне кіріскен, «БГҚ Түркістан» серіктестігінің құрылыс алаңына барып, қуаты 1000 МВт-қа дейінгі бу-газ электр станциясының (БГҚ) құрылысының барысымен танысты.

«БГҚ Түркістан» өкілдері аудан әкіміне болашақ станцияның макетін таныстырып, жобаның инженерлері бу-газ қондырғысының технологиялық ерекшеліктері, оның экологиялық тиімділігі және өңір үшін әлеуметтік маңызы туралы баяндады. Қазіргі таңда Сайрам ауданының тұрғындары құрылыс жұмыстарына тартылған, ал алдағы уақытта жергілікті мамандарды жұмыспен қамту шаралары құрылыс көлемі ұлғайған сайын жалғасын табады.

Қазіргі уақытта нысанда құрылыс-монтаж жұмыстары жүргізіліп, ірі габаритті технологиялық жабдықтарды жеткізу және орнату жұмыстары жалғасуда.

Мадияр Оразалиев аудан әкімі лауазымына жуырда тағайындалғандықтан, бұл сапар танысу сипатында өтті. Сапар қорытындысы бойынша әкім жобаның өңірдің дамуы үшін стратегиялық маңызға ие екенін атап өтіп, компаниямен сындарлы ынтымақтастық орнатуға дайын екенін білдірді. Сондай-ақ ол электр станциясы құрылысы жобасын табысты іске асыруға жәрдемдесу және қолдау көрсету мәселелерін талқылауға әрдайым ашық екенін атап өтті.